رمضان كريم

رمضان رمضان اهلا رمضان


طبعا كل المدونين و المدونات حاليا بينزلوا تدوينات حلوة بتحكي عن ذكراياتهم مع رمضان او ترحيبهم بالشهر الكريم  و تبريكات بقى و دعوات الى اخره.


اخترت اني كمان  اتكلم شوية عن رمضان اللي كان و لا زال ليه طعم خاص اوي عندي من و انا صغيرة قد كده .. يعني صغيرة خالص طالما مش  شايفين قد اي يعني .

رمضان في المغرب له تقاليد خاصة زيه زي كل البلدان العربية الشقيقة ,الناس هنا لازالت  مصممة على انها تحي التقاليد دي كل سنة ولو انه في حاجات كتير اندثرت  مع الاسف , اهمها المسحراتي و النفار .
 انا بعتبر نفسي محظوظة اوي الحمد لله اني   لحقتهم في اخر ايامهم و كنت بحب اوي اصحى على صوت الطبل و هو بيدق في نص الليل و خصوصا انه كان بيتوصى ببيتنا كتير و بيضرب في الباب ضربات مرعبة  ده لانه كان بيعرف العيلة كويس  الله يسامحه بقى . 

من التقاليد الجميلة اللي  عمرها ما فارقت بيتنا الحلويات الرمضانية الجميلة بقى .. كنت  بكون في قمة سعادتي و انا بشوف مامتي و عمتي و جدتي كمان بيجهزوا البقلاوة و السفوف  و الريحة الجميلة بتاعت  اللوز و البهارات اللي كانت بتفضل في البيت لاكتر من اسبوع , بس دلوقتي لما كبرت ولو اني يعني بحبها اوي بس بقيت بشد شعري و اقول يا عالم ارحمونا بقى  معلش مش بحب اتعب نفسي.

كل اما يجي رمضان افتكر اصحابي و بيتنا القديم و المشاوير اللي بعد طلوع المدرسة عشان نجيب طلبات البيت  قبل الفطار , رغم ان المشوار مكنش بعيد اوي يعني بس  كان ليه طعم خاص جداا .


السنة دي للاسف مش زي كل سنة مش حيكون في لمة عيلة زي كل مرة كل واحد ليه ظروف اكتر حاجة حفتقدها الضحك اللي كنا بنضحكه انا و عمي قبل المغرب ما يأذن بدقايق و  احنا بنتفرج على ابو ظبي عشان نشوف مسلسل يقوموا يجيبوا  اشهار شركة اتصالات و يجي مقطع يقول و هاذي ام الخير مستانسة بزوارها  و مراته جايبة  الشوربة   يا سلااام احلى ايام و الله.

قبل ما اختم احب انوه اني كاتبة البوست بالعامية المصرية تحية مني لكل اصدقائي الغاليين المصريين , و احب اقولهم واحد واحد كل سنة و انتم طيبين و مصر الحبيبة طيبة و دايما منصورة و راية الحرية بترفرف في سماءها.
و مش حننسى طبعا كل الشهداء اللي توفاهم الله طوال فترة الاحداث اللي حصلت السنة دي ربنا يرحمهم و يسكنهم فسيح الجنان .

كل سنة و كل  الامة الاسلامية بالف خير و اخص  بالدعاء اخواتنا اللي في محنة حاليا سواء  تونس في سوريا او ليبيا او اليمن يارب  يكون الشهر الكريم ده فاتحة خير عليهم و يحمل معه الكتير الكتير من السلام و الخير لكل بلاد العرب و المسلمين و نصرة قريبة ان شاء الله .

رمضان كريم .